बुधबार, असार २, २०७८
Wednesday, June 16, 2021

बाजुराका छाउगोठ भत्काउने तयारीमा प्रहरी

२ माघ,बाजुरा । जिल्ला प्रहरी कार्यालय बाजुराले छाउगोठको तथ्याङ्क सङ्कलन गर्न थालेको छ। प्रहरीले सदरमुकाम मार्तडीस्थित बडिमालिका नगरपालिकाबाट छाउगोठ तथ्याङ्क सङ्कलन प्रारम्भ गरेको हो।

छाउगोठको तथ्याङ्क सङ्कलन गर्न जिल्ला प्रहरी कार्यालय, विमानस्थल सुरक्षागार्ड कोल्टी, पीलुचौर इलाका प्रहरी कार्यालय, धुलाचौर, डोगडी, टाँटे प्रहरी चौकीलगायत १४ स्थानबाट प्रहरी टोली खटिएको प्रहरी नायब उपरीक्षक उद्धवसिंह भाटले जानकारी दिए।

छाउगोठको तथ्याङ्क सङ्कलन गर्न भाट आफैँ खटिएका छन्। “पहिलो चरणमा छाउगोठ रहेको स्थानको पहिचान तथा संख्या यकिन गर्ने रणनीति बनाएका छौँ,” भाटले भने।

भाटको नेतृत्वमा बडिमालिका नगरपालिकाका नौ वडामा छाउगोठ पहिचान गर्न टोली खटिएको छ। हालसम्म बडिमालिका नगरपालिका–९ उखाडी, चौराटा, बडिमालिका २, १, ४ तथा त्रिवेणी नगरपालिकाका विभिन्न टोलमा छाउगोठको अवस्था अध्ययन गरिएको छ।

पीलुचौरले बाँधु आसपास र विमानस्थल सुरक्षागार्डको टोलीले कोल्टी बजार आसपासको गाउँमा तथ्याङ्क सङ्कलन गरिरहेको छ। ती ठाउँमा अहिलेसम्म ८० भन्दाबढी छाउगोठ भेटिएको छ।

सबैभन्दा बढी त्रिवेणी नगरपालिकाको वडा नम्बर ६ मा ४९ छाउगोठ पाइएको छ। “तथ्यांक संकलनपछि सबैको रोहवरमा छाउगोठ भत्काउँछौँ,” भाटले भने, “गत साता बूढीनन्दा नगरपालिका–९ पाण्डुसैनमा छाउगोठमा आमा र दुई छोराको मृत्यु भएपछि अभियान थालेका हौँ।”

  •  
  •  
  •  
  •  
  •  
  •  
  •  
  •  

WRITE COMMENTS FOR THIS ARTICLE